710.000 krónur latast í útoyggjastuðli

Nú ber til at søkja um stuðul til tiltøk, sum virka mennandi fyri útoyggjar. Einstaklingar, virki, feløg og kommunur kunnu fáa stuðul til tiltøk.

Heilsu-og innlendismálaráðið skrivar á heimasíðu síni, at játtanin verður umsitin eftir reglugerðini um stuðul til útoyggjamenning, og játtanin er 710.000 krónur.

Serligt umsóknarblað skal nýtast til umsóknina, og tað fæst á heimasíðuni hjá ráðnum. Evsta mark at søkja er fríggjadagin í næstu viku, 11. mars.