Fráboðanarskyldan í grindalógini ikki strikast

Tað ætlar Høgni Hoydal, landsstýrismaður í Fiskivinnumálum. Fyrsta viðgerð av ætlaðu broytingunum verður í Løgtinginum í dag.

Mikið kjak stóðst av, at revsingin fyri ikki at boða frá grind varð herd við bót í fjør í sambandi við, at Sea Shepherd skipaði fyri umfatandi átaki móti grindadrápi her á landi.

Hava longu rópt varskó

Tað var serliga ferðavinnan, ið talaði harðast at, tí bæði fráboðanarskyldan og herda revsingin stygdu ferðafólk burtur. Hetta heldur ferðavinnan enn fast um.

Í hoyringssvari til lógarbroytingina, skrivar Guðrið Højgaard, stjóri í Visit Faroe Islands, at tað er sera óheppið fyri ferðavinnuna, at ferðafólk eisini eru umfatað av fráboðanarskylduni.

Hetta ger, at ferðafólk verða noydd - um tey ynskja tað ella ikki - at taka støðu til grindadráp. Og tað hevur neiliga ávirkan á ferðavinnuna.

Útlit til færri ferðafólkaskip í ár

- Vit meta ikki, at avtøka av revsingini er nóg mikið til at broyta hetta, skrivar Guðrið Højgaard, stjóri í Visit Faroe Islands, í sínum viðmerkingum.

Stjórin í Visit Faroe Islands vísir á, at tað finnast ítøkilig dømi um, at fráboðanarsskyldan styggir ferðafólk.

Eitt nú er talið av ferðafólkaskipum minkað niður í helvt í ár, tí fleiri ferðafólkaskip avgera ikki at koma til Føroyar orsakað av núverandi lóggávu á økinum.

Ikki rætt at strika fráboðanarskylduna

Hóast revsingin fyri ikki at boða frá grind nú skal strikast, so metir Fiskimálaráðið ikki, at tað er rætt at strika fráboðanarskylduna.

Fráboðanarskyldan er bæði skilhaldsregla og skylda, sum tryggjar, at grindadrápið verður skipað á besta hátt, sambært Fiskimálaráðnum.

Verður grind fráboðað ov seint ella als ikki, kann hetta elva til óskipaðan rakstur og grindadráp, sum ger, at hvalirnir líða óneyðugt, stendur í uppskotinum.