Skógfriðingarnevnd takast av

Sambært lógini um viðarlundir hevur Skógfriðingarnevndin framvegis evstu ábyrgd av skógfriðaðum lendi, men allar fíggjarligu heimildirnar eru hjá Umhvørvisstovuni.

Sostatt eru materiellu og fíggjarligu heimildirnar á hvør sínum stað, og tað elvir til áhaldandi fyrisitingarligar trupulleikar, sigur Sirið Stenberg.

Tíðin farin frá skipanini

Landsstýriskvinnan er av tí fatan, at tíðin er farin frá einari skipan, har slíkar heimildir eru hjá nevndum uttan fyri almennu fyrisitingina.

Sambært uppskotinum verða spardar umleið 70.000 krónur um árið við at taka Skógfriðingarnevndina av, og 30.000-40.000 krónur verða spardar í effektiviseringum í arbeiðsgongdini á Umhvørvisstovuni.

Eftir uppskotinum skulu avgerðir nú kunnu kærast til kærunevndina í lendismálum, og Umhvørvisstovan skal eisini frammanundan góðkenna øll inntriv í skógfriðað lendi.