Skifta ikki kós

-Vit hava fingið øll neyðug loyvi og hava kunnað á rætta stað. Avgerðin er tikin, og til ber ikki at flyta vegin nakað munandi, uttan at gera alla verkætlanina umaftur, sigur Teitur Samuelsen, stjóri í partafelagnum Eystur- og Sandoyartunlar.

Hóast Teitur Samuelsen, stjóri í partafelagnum Eystur- og Sandoyartunlar, sigur seg skilja sjónarmiðið um at vegurin til tunnilsmunnan forðar Hvítanesi í at veksa, so er tað ikki eitt atlit, sum fær felagið at broyta kós.

-Tað ber ikki til at flyta vegin stórvegis, uttan at gera alla tunnilsverkætlanina um aftur, sigur hann. 

Við hesum sipar hann til sjálva linjuføringina - tað vil siga, hvar undirsjóvartunnilin millum Streymoynna og Eysturoynna skal liggja.

Nú er tunnilsfelagið komið somikið langt við sínum ætlanum, at arbeiðið verður ikki gjørt umaftur, sigur Teitur Samuelsen.

Sambært tunnilsstjóranum hava ráðgevarnir hjá felagnum tó fingið boð um, í størst møguligan mun at taka hædd fyri teimum viðmerkingum, sum eru komnar frá fólki á Hvítanesi og øðrum um nýggja íbindingarvegin til Eysturoyartunnilin.