Føroyar fáa tvey váðaráð

Um føroyska váðaráðið, sum ætlanin er at stovna, mælir til at herða krøvini til peningastovnarnar í Føroyum um kapital, hvør myndugleiki skal so seta bankum og sparikassum hesi krøv? 

Fíggjarøkið er ikki yvirtikið. Føroyskir peningastovnar eru tí ikki undir føroyskum myndugleika. 

Bill Justinussen í Miðflokkinum vil nú hava meira at vita frá Kristinu Háfoss, landsstýriskvinnu, um Føroya váðaráð.  

Hann hevur tí sett henni átta spurningar. 

Millum annað spyr hann, um ætlanin er at yvirtaka málsøkið.   

Eftirlitið í Danmark

Bill Justinussen minnir á, at eftirlitið við peningastovnunum í Føroyum er í Danmark.

Og fyrst í desember í 2014 samtykti eitt samt løgting, teirra millum Kristina Háfoss, at danska váðaráðið harumframt eisini virkar í Føroyum.

Og landsstýrismaðurin í vinnumálum heitti á danskar myndugleikar um at lata danska váðaráðið ansa eftir tryggingarfeløgunum í Føroyum eisini, hóast trygging er yvirtikið málsøki.  

Tvey váðaráð

Viðkomandi er at spyrja, sigur Bill Justinussenm, um lítla landið Føroyar skal hava tvey váðaráð, eitt føroyskt og eitt danskt, samstundis sum nógv lond í Evropa ikki enn hava stovnað egið fíggjarligt váðaráð. 

Tað hevur eisini týdning at fáa greiðu á, um føroyskir myndugleikar kunnu áleggja føroyskum peningastovnum størri kapitalkrøv, sigur Bill Justinussen.

Kristina Háfoss hevur tíggju dagar at svara spurningunum.