Strandferðslan vil hava skip afturat

Flotin hjá Strandfaraskipum Landsins er nú so gamal, at ynskiligt er at hava eitt eyka skip at avloysa, tá gomlu skipini fara til umvælingar.

Tað sigur Jóhan Petur Abrahamsen, rakstrarleiðari hjá Strandfaraskipum Landsins.

Fleiri av skipunum eru millum 35 og 45 ár, og hava tí javnar tørv á umvælingum.

Ternan er seinasta dømi um dýra og langdrigna umvæling. Hon fór á beding fyri nøkrum vikum síðani at umvæla gearini. Ætlanin var, at hon skuldi koma aftur í sigling fyri sløkum tveimum vikum síðani, men hon kemur neyvan aftur á Nólsoyarfjørð fyrr enn um tvær vikur. Tað merkir, at privati báturin Jósup verður leigaður inn at røkka Nólsoyarleiðina.

"Tað er ikki einans keðiligt fyri nólsoyingar, ið vilja hava bilin við. Tað er eisini dýrt fyri landið", sigur Jóhan Petur Abrahamsen.