Føroyingar ikki áhuga fyri fiskinum

Tríggjar lastir eru higartil bodnar út á Fiskamarknaðinum. Reiðaríini áseta sjálv minstaprísin. Men einki boð kom, bara onkur fyrispurningur, sigur stjórin í Fiskamarknaðinum, Høgni Hansen.

Í gjár vóru 531 tons av flaki hjá Gadusi á Fiskamarknaðinum, fríggjadagin royndi Sjúrðarberg at selja 138 tons av frystum fiski. 30. august vóru 125 tons av flaki hjá Ennibergi á Fiskamarknaðinum, men eingin bjóðaði upp á fiskin.

Sambært lógini og kunngerðini um royndaruppboðssøluna skal fiskurin úr Barentshavinum bjóðast út til føroyskar fiskakeyparar. Men kemur einki boð, kunnu reiðaríini selja fiskin sum tey vilja.