Neyðugt við eykajáttan

Landsstýriskvinnan í heilsumálum hevur sagt Løgtingsins fíggjarnevnd, at játtanin til Suðuroyar Sjúkrahús er ov tepur.

Ronnie Midjord, sjúkrahússtjóri, hevur biðið um, at játtanin verður hækkað við 700.000 krónum.

Meirnýtslan kemst av serligum lønarútreiðslum, millum annað, at avloysarar eru settir fyri starvsfólk í farloyvi, fleiri tilkall og sjúkraflutningar til Havnar og broytt vaktarsamsýning.

Viðlíkahaldið kostar meira

Viðvíkjandi rakstrarútreiðslunum hava serligar útreiðslur verið til neyðugt viðlíkahald, umframt at rakstrarkostnaðurin av reagensum er øktur munandi.

Løgtingið fer mikudagin at viðgera, um sjúkrahúsið skal hava 100.000 til sjúkraflutningstænastuna.

Men sjúkrahússtjórin biður nú um, at játtanin verður hækkað við 700.000 krónum afturat.