Suðuroyar Sjúkrahús manglar eina millión

Ein millión krónur koma at mangla í hjá Suðuroyar Sjúkrahúsi, um játtanin verður tað, ið stendur í fíggjarlógaruppskotinum fyri komandi ár, sæst í skrivi frá Heilsumálaráðnum til Fíggjarnevndina hjá Løgtinginum.

Suðuroyar sjúkrahús hevur greitt frá, at viðvíkjandi játtanini fyri 2017 verður neyðugt at sparingar verða framdar fyri eina millión krónur.

Leiðslan á sjúkrahúsinum arbeiðir við at finna fram til, hvussu hetta kann verða gjørt, men metir longu nú at neyðugt verður at finna hesar innan lønarkarmin, stendur í skrivinum frá Heilsumálaráðnum til Fíggjarnevndina.

Ronnie Midjord, stjóri á Suðuroyar Sjúkrahúsi, sigur við útvarpið, at talan verður ikki um uppsagnir, men at talan verður um náttúrliga frágongd av starvsfólki, og at aðrar sparingar eisini verða gjørdar.