Kanning: Javnstøðulógin ov avmarkað

Javnstøðulógin er alt ov avmarkað. Hon eigur ikki bara at vera um kyn, men eisini um mismun, sum stendst av húðarliti, aldri og breki.

Um tað er eingin ivi í Gallupkanning, Javnstøðunevndin gjørdi í november í fjør. 68 prosent halda, at javnstøðulógin skal víðkast. 22 prosent halda ikki, at lógin skal viðgera annan mismun enn mun á kynunum.

Tíggju prosent svaraðu, at tað vistu tey ikki. Serliga menninir vilja hava javnstøðulógina víðkaða til at fevna um onnur viðurskifti enn bara kyn.

Lógin kanska víðkað í Føroyum

Í hinum Norðurlondunum, fyrst og fremst í Skandinavia, umfatar javnstøðuarbeiðið nógv annað enn kyn. Tað umfatar alt slag av mismuni.

- Tað kann væl hugsast, at vit í Føroyum eisini fara at víðka javnstøðulógina. Javnstøðunevndin og landsstýriskvinnan í javnstøðumálum hava umrøtt málið, men enn er eingin niðurstøða gjørd, sigur Ólavur Ellefsen, formaður í Javnstøðunevndini. 

Sjálvur tekur formaðurin undir við einum fjølbroyttari javnstøðuhugtaki. Eitt av nógvum aðalorðaskiftum í løgtinginum í hesari tingsetuni, sum samgongan hevur boðað frá, verður um javnstøðu.