Fleiri ungfólk arbeiða í handli

Ábendingar eru um, at handilsvinnan brúkar unga arbeiðsmegi meira nú enn fyrr.

Helst eru hetta ung fólk, sum arbeiða niðursetta tíð, og hava arbeiði sum hjáinntøku, meðan tey ganga í skúla, sigur Hagstovan.

Hagstovan hevur kannað vinnugreinina handil og umvæling og samanborið árini 1988, 2004 og 2016.

3.000 fólk

Okkurt um 3.000 fólk arbeiða í hesari vinnuni, sum fevnir um handlar og sølur, sum eisini hava verkstøð til umvælingar, til dømis bilasølur.

Kreppan fyrst í nítiárunum gjørdi, at meiri enn triðingur av løntakarunum fór úr handilsvinnuni. 

Seinastu átta árini er handilsvinnan bara vaksin í Streymoyar sýslu. Annars arbeiða færri í handlum og á verkstøðum.

Afturgongd í Suðuroynni og Sandoynni

Serliga stór er afturgongdin í Suðuroyar sýslu og Sandoyar sýslu, har eru yvir 30 prosent færri í vinnugreinini enn í 2008. 

Eisini í Norðoya sýslu er stór afturgongd. Fimti hvør er farin úr vinnuni seinastu átta árini.