- Tíðindi, mentan og ítróttur
Løgregluátak í náttarlívinum riggar væl

Átakið hjá løgregluni um at vera sjónligari í náttarlívinum riggar væl. Tað halda tey á løgreglustøðini í Havn. Heilt stutt snýr tað seg um at vera til staðar og vera sjónlig, tá skeinkistøðini lata aftur og fólk savnast á gøtunum. Vakthavandi á løgreglustøðini í Havn í morgun greiðir frá, at hóast nógv fólk vóru í býnum í høvuðsstaðnum í nátt, var einki harðskapsmál. Sambært teimum hava tey einki harðsskapsmál í høvuðsstaðnum higartil í ár. Í fjør høvdu tey tíggju harðsskapsmál um somu tíð.
Eitt amboð, løgreglan brúkar oftari nú enn fyrr, er at geva bøtur. Hetta er fyri brot á politiviðtøkurnar, so sum at vísa ófantaligan atburð yvirfyri løgregluni, men eisini um tú órógvar løgregluna, tá tey royna at gera sítt arbeiði. Tað var tað ein, ið fekk bót fyri í nátt. Tá løgreglan tók hann til síðis, vildi viðkomandi ikki upplýsa hvør hann var - og so fekk hann eina aðra bót á 750 krónur.
Annars hevur løgreglan kanna skeinkistøð í høvuðsstaðnum og Norðurøkinum í nátt, men har var alt sum tað skuldi vera.
Eisini kannaðu tey bilar - í Norðurøkinum var ein tikin, sum koyrdi bil í frákoyringartíðini. Tað merkir, at hann hevur havt koyrikort, men hevur mist tað í eitt tíðarskeið - og nú hann var tikin at koyra bil meðan hann einki koyrikort hevði, kann hann rokna við eini stórari bót.
