Fyribyrgja ferðsluruðuleika í Havn

Trýstið er nú so stórt á Varðagøtu í Havn um morgnarnar, at Tórshavnar kommuna hevur gjørt av at ferðslan skal vera einvegis ein tíma hvønn morgun gerandisdagar.

Hvønn morgun fara oman fyri 300 børn í Sankta Frans skúla og onnur 200 børn skulu í dagstovn ella í forskúla, sum er við síðuna av.

Sett í verk í februar

Tí fer kommunan at seta upp klokkustýrd vegaskelti við Varðagøtu, so bert verður loyvt at koyra omaneftir frá klokkan 7:30 til 8:30 hvønn morgun frá mánadag til fríggjadag.

Klokkustýrda talvan verður sett upp við vegamótið Sjúrðargøta/Varðagøta, og er hetta fyrsta skipanin av sínum slag í Tórshavnar kommunu.

Skipanin við einvegis ferðslu verður sett í verk í februar, skrivar Tórshavnar kommuna á heimasíðuni, torshavn.fo