Sambandsflokkurin leggur sítt fram

Sambært Sosialinum í gjár ætlar Sambandsflokkurin at leggja sítt uppskot fram, um semja ikki fæst við samgonguna um uppskotið hjá Høgna Hoydal, landsstýrismanni.

Bárður á Steig Nielsen, formaður í Sambandsflokkinum, sigur við Sosialin, at Sambandsflokkurin hevur treytað sær í samráðingunum við Høgna Hoydal, at fæst ikki semja um fiskivinnunýskipanina, skulu tingfólk í samgonguni taka undir við, at uppskotið hjá Sambandsflokkinum verður lagt fram, hóast farið verður út um seinasta framløgudagin 7. mars.

17 undirskriftir mugu til

Fyri at uppskot kann leggjast fram eftir seinasta framløgudag, krevjast undirskriftir frá 17 tingfólkum, so Sambandsflokkurin hevur brúk fyri undirskriftum úr samgonguni.

Ikki verður sagt í samrøðuni við Sosialin, um Høgni Hoydal og samgongan hava játtað at hjálpa Sambandsflokkinum eftir 7. mars.

Bárður á Steig Nielsen sigur, at brúkar Sambandsflokkurin alla tíðina at samráðast við samgonguna, eru ikki stundir at gera floksins egna uppskot klárt at leggja fyri tingið.

Tí má flokkurin hava tær 17 undirskriftirnar eftir 7. mars, sigur hann.