Seinasta kvinnan avhoyast í dag

Í dag er triðseinasti dagur í rættarmálinum, og tann seinasta av teimum 12 kvinnunum verður avhoyrd kl.13.

Í øllum 12 førunum er talan um brot á grein 150 og 232. Grein 150 snýr seg um, at persónur í almennari tænastu misnýtir sína støðu - í hesum førinum at kommunulæknin er farin út um sínar heimildir.

Seinna greinin er 232, sum snýr seg um "blufærdighedskrænkelse", altso blygdanarskemd.

Í einum føri er tó talan um aðrar ákærur móti læknanum. Hann er ákærdur fyri at hava tvingað eina kvinnu til aðra kynsliga samveru enn samlegu. Her er talan um brot á grein 224 og 217.

Rættarfundir í hesum máli hava verið mánadagin og týsdagin í hesi vikuni. Hetta er sætti dagurin, Føroya Rættur brúkar uppá málið.

Tá rættarfundurin í dag er av, eru bara tveir dagar eftir. Tað er mánadagin og týsdagin, tá procedura er á skránni. Dómur fellur væntandi eina viku eftir tað, tað vil siga umleið hálvan februar.

Kommunulæknin noktar seg sekan í øllum ákærum. Verður hann dømdur, er hann egnaður til vanliga revsing og samfelagstænastu. Tað staðfesta persónskanningar av honum, sum ákærin tók fram á opnum rættarfundi fyrr í vikuni.

Rættarfundurin í dag er fyri afturlatnum hurðum.