Kapping um at skriva útvarpsleik

Kringvarpið hevur skrivað út kapping um at skriva besta útvarpsleikin, nú 60 ár eru liðin síðani útvarpið fór at senda.

Vinnandi útvarpsleikurin fær 25.000 krónur og leikurin verður sendur í útvarpinum. Onnur virðislønin í kappingini er 10.000 krónur.

Eitt úrval av innkomnu handritunum í kappingini verður eisini framleitt til útvarpsleikir, ið síðani verða sendir í útvarpinum.

Skal endurspegla samtíðina

Dentur verður lagdur á, at handritið til nýggjan føroyskan útvarpsleik endurspeglar nútíðarsamfelagið, stendur í treytunum.

Endamálið við kappingini er at eggja til at skriva nýggjar útvarpsleikir og fáa til vega nýggj handrit at brúka, sigur stovnurin í tíðindaskrivi.

Jenny Petersen, Bergur D. Hansen, Elin á Rógvi og Páll Danielsen sita í dómsnevndini. Freistin, at senda inn leikir, er 20. apríl 2017.