Tvey lið í Italia

Talan er um unglingaliðið hjá Støkk, Vípan, og kvinnuliðið hjá Fimleikafelagnum Ljósið, Team Hydra, sum leygardagin skulu kappast við bestu lið í heiminum um møguleikan at koma í finaluna sunnudagin. Kvinnurnar kappast í World Cup kapping, meðan unglingarnir kappast í Challenge Cup.

unglingar_vipan.jpg

Kappingin eitur III Mediterranean Countries Open AGG, og verður hildin í Padua í Italia. Til ber at fylgja við live stroyming av kappingini á hesari síðuni

unglingar_vipan2.jpg

Kappingin hjá unglingum og kvinnum byrjar klokkan 15 leygardagin og er skipað á tann hátt, at unglingar og kvinnur skiftast um at vera á gólvinum. Vípan skal á gólvið sum nummar 6 av unglingaliðunum, og Team Hydra skal á gólvið sum nummar 26 av kvinnuliðunum.

kvinnur_hydra.jpg

Umframt at vera umboðað við einum unglingaliði og einum kvinnuliði, so eru Føroyar eisini umboðaðar av tveimum dómarum á ferðini. Elna Johannesen og Beinta Danielsen eru longu í gongd í Padua, tí í døgunum undan kappingini er dómaraskeið á skránni, og hesum skeiði luttaka tær á, áðrenn tær skulu døma um vikuskifti.