Selja fleiri bilar í Grønlandi

Fleiri nýggir bilar verða seldir í Grønlandi, og tað er tekin um, at tað gongur betur búskaparliga, sigur Grønlandsbankin.

Í fjør vórðu seldir 321 nýggir bilar í Grønlandi, og tað eru 7,7 prosent meira enn árið fyri, vísa tøl hjá grønlendsku hagstovuni.

Peter Petersen, privatkundastjóri í Grønlandsbankanum, sigur við grønlendska kringvarpið, at eftirspurningurin eftir fígging at keypa bil er vaksin, og tað er tekin um, at fólk hevur meira um pening um hendur.

Keypa smáar bilar

- Nógv verður bygt, tað gongur væl í fiskivinnuni, og prísurin er góður. Tað merkir, at inntøkan er vaksin, og fleiri hava fulltíðarstarv, sigur privatkundastjórin í Grønlandsbankanum.

Bilsølurnar siga, at áhugin fyri smáum bilum er vaksin. 30 prosent fleiri smáir bilar vírðu seldir í fjør enn í 2015.

Sambært grønlendsku hagstovuni batnaði handilsjavnvágin eina milliard og 274 milliónir krónur í fjør samanborið við árið fyri.