Trúboðarar uttanlands somu rættindi sum í Føroyum

Bæði samgongan og andstøðan í løgtinginum eru samd við Jógvan á Lakjuni, sum vil, at føroyskir trúboðarar uttanlands eiga at varðveita øll síni rættindi í Føroyum.

Øll í Rættarnevndini uttan Sonja Jógvansdóttir mæla løgtinginum til at samtykkja uppskotið. 

Løgtingið fer at atkvøða um málið í morgin, tá onnur viðgerð er á dagsskránni.

Varðveita rættindi

Jógvan á Lakjuni, løgtingsmaður, vil hava løgtingið at fáa landsstýrið at gera lógaruppskot, sum skal tryggja, at føroyingar, sum eru uttanlands í trúboðanarvirki ella í øðrum hjálpargóðum og manngóðum arbeiði, varðveita øll síni vanligu rættindi í Føroyum. 

Jógvan á Lakjuni sigur, at hesi fólk eru ikki í heilsuskipanum ella trygdarskipanum, hvørki her heima ella uttanlands.

Tvær ferðir hevur Sjálvstýrisflokkinum havt uppskot um at broyta lógina um fólkayvirlit, so millum annað trúboðarar uttanlands ikki verða skrásettir at vera fluttir av landinum.

Men uppskotini vórðu ikki samtykt í løgtinginum.

Landsstýrið arbeiddi eisini við málinum tá, tað var í 2009 og 2010, men einki kom burturúr.