Trygdin í Mjørkadali óbroytt

Einki er broytt viðvíkjandi trygdini í arrestini í Mjørkadali fyribils, meðan bíðað verður eftir viðmerkingum frá trygdardeildini hjá direktoratinum fyri Kriminalforsorgina í Danmark. 

Kriminalforsorgin í Føroyum hevur sent direktoratinum frágreiðing um hendingina, tá ein fangi fyri sløkum mánað síðani flýggjaði úr arrestini. 

Tað var 19. apríl, at ein maður, sum sat í arrestini í Mjørkadali, fór út í eina bingju við ruski. Eingi starvsfólk vóru við honum, og hann gjørdi sær dælt av støðuni og rýmdi upp um stikið. Maðurin varð tó handtikin dagin eftir. 

SÍ EISINI Ikki nóg gott at vera í geglinum í Mjørkadali

Direktoratið fer annaðhvørt at koma við tilmæli um broytingar í reglunum fyri arrestina í Mjørkadali, ella eru tey nøgd við trygdina, sigur Elkin Klettheyggj, leiðari fyri Kriminalforsorgini í Føroyum.

- At fangar sleppa út við einum ruskposa, er ikki brot á trygdina í arrestini, segði hon við útvarpið, dagin eftir hendingina.

Tá svar kemur frá Direktoratinum í Danmark, fara Kriminalforsorgin í Føroyum og leiðslan í varðhaldinum í Mjørkadali at taka støðu til, um nakað skal broytast.