Størri innflutningur í ár

Innflutningurin fyrsta ársfjórðing í ár vaks 24 prosent samanborið við somu tíð í fjør, ella 353 milliónir kr. 

Innflutningurin fyrstu tríggjar mánaðirnar var ein milliard og 850 milliónir krónur, vísa tøl hjá Hagstovuni.

Verða skip og flogfør ikki tald við, vaks innflutningurin 17 prosent.

Fleiri skip eru komin í flotan í ár, men vit hava eisini innflutt meira brennievni.

Meira er innflutt av rávøru til fiskavirking. Vøksturin er góðar 50 milliónir kr. ella 65 prosent.

Seinastu árini er innflutningurin av byggitilfari nógv vaksin, men fyrsta ársfjórðing í ár er ein lítil minking.

Innflutningurin av akførum er eisini vaksin seinastu árini, og har er framvegis stórur vøkstur, sigur Hagstovan.