Kommuna leigar marghøll fyri 15 milliónir krónur

Vágs kommuna hevur bundið seg til at leiga marghøllina, sum skal byggjast á Oyrunum í Vági, í 15 ár.

Leigan er ein millión krónur um árið. Fyrsta árið er 2019. Streymur og hiti eru við í leiguni.

Leigusáttmálin millum Vágs kommunu og Vágs ítróttaráð, sum er á donskum, sigur, at Vágs kommuna hevur rætt til at brúka marghøllina gerandisdagar millum klokkan 08.00 og 16.00.

Uttan fyri ta tíð hevur kommunan fyrsta rætt at brúka høllina.

Sambært leigusáttmálanum hevur Suðuroyar sparikassi, sum letur lán til byggingina, sett nakrar treytir fyri at tryggja sínar pengar í marghøllini. 

Millum annað kann leigusáttmálin hvørki broytast ella sigast upp uttan at Sparikassin góðtekur tað.