HM finalan fór aftur við borðinum

Sverri Sandberg Nielsen hevur róð hálvfinalu í heimsmeistarakappingini fyri single scullarar í Florida í USA fyri løtu síðani, men hann var akkurát ov stuttur til at røkka finaluplássinum.

Tríggir teir fremstu rógvararnir sleppa víðari í sjálva finaluna, og Sverri kom á mál sum nummar fýra, og tí verður onki finalupláss til hansara.

Týskarin var drúgvari

Sverri legði hart út og var millum tríggjar teir fremstu í startinum, men á 500 metrum vóru heilir fimm scullarar so at siga púra javnir.

Á 1.000 metrum var Sverri næstaftastur, men tá hann hevði róð 1.500 metrar hevði hann vunnið seg fram á fjórða plássið.

Har gjørdi hann ein vørr og royndi veruliga at taka týskaran á triðja plássi aftur, men tað var ov seint. Týskarin fór um málstrikuna hálvt annað sekund fyrr enn Sverri.

Kekkia, Kuba, Ný Sæland, Bretland, Kroatia og Týskland verða umboðað í A finaluni í HM sunnudagin, meðan Sverri við sínum fjórðaplássi skal rógva í B-finaluni.