Vil hava fleiri at søkja stjórastarvið í Sernámi

Setanarnevndin kom til tað úrslit, at best er fáa fleiri umsøkjarar.

Tí er starvið lýst leyst av nýggjum.

Tað sigur Poul Geert Hansen, aðalstjóri í Mentamálaráðnum, nú ráðið søkir eina ferð afturat eftir stjóra til Sernám.

Átta umsóknir vóru fyrru ferð. Umsøkjararnir hava fingið at vita, at teirra umsóknir telja við, nú søkt verður av nýggjum.

Setanarnevndin hevur lisið allar umsóknirnar, sum komu, og niðurstøðan er, at best er at fáa fleiri umsóknir.

Poul Geert Hansen vil ikki siga, hví tað er niðurstøðan, heldur ikki, um eingin av teimum átta umsóknunum var nóg góð.  

Skuldi taka við í næstu viku

Fyrst í oktober varð søkt eftir stjóra til Sernáms at taka við 1.november ella skjótast gjørligt.

Umsóknarfreistin var bara tvær vikur. Hon var til 19.oktober, stóð í lýsingini hjá Mentamálaráðnum.  

Men nú verður lýst av nýggjum, og umsóknarfreistin er 13.november. Og stjórin skal taka við 1.desember ella sum skjótast.

Annars er ein fyribils leiðsla sett at stýra Sernámi hetta árið.

Magnus Tausen er settur sum fyribils leiðari, Frida Poulsen sum fakligur leiðari og Anna Kass sum fíggjarleiðari í Sernámi.

35 fólk arbeiða í Sernámi, sum hevur ábyrgdina av at samskipa sernámsfrøðiligt virksemi og ráðgeva stovnum, skúlum og øðrum um børn og ung.