10 kvinnur vitna í Eystara landsrætti

Kommunulæknin er ákærdur fyri at hava framt blygdarskemd móti níggju kvinnum og fyri annað kynsligt samband enn samlegu við eina kvinnu, sum var komin til læknaviðtalu.

Hjásitin hjá kvinnunum, Christian Andreasen, bað um afturlatnar hurðar, meðan kvinnurnar vitnaðu. 

Tá er eingin atgongd í rættarhølið fyri fjølmiðlar og almenningin annars. Tó var ein kvinna, sum vildi vitna fyri opnum hurðum. Tað gjørdi hon eisini í Føroya Rætti.

Tá hesar vitnisfrágreiðingar eru lidnar seinni í dag, endar innleiðandi próvførslan við proceduru. Tá siga ákæri og verji sína fatan av, hvussu málið hongur saman við støði í tí, sum er komið fram í málinum. 

Dagurin er tó ikki ásettur enn, nær proceduran verður, tí bíðað verður eftir úttalisi frá danska rættarlæknaráðum um læknafakligu viðurskiftini í málinum.

Proceduran verður 21. februar 2018 í rættarhølinum hjá Eystara Landsrætti í Keypmannahavn.