Fullur føroyskur limaskapur fyri á ársfundinum

Spurningurin um sjálvstøðugan føroyskan limaskap í Norðurlandaráðnum verður avgjørdur í formansskapi ráðsins hósdagin.

Aksel V. Johannesen, løgmaður, og Poul Michelsen, landsstýrismaður, løgdu uppskotið fram í fjør.

Men longu tá var greitt, at tað fór ikki at vinna frama.  

Sambært skránni fyri ársfundin hjá Norðurlandaráðnum, sum byrjar í dag í Helsinki, eru orðaskifti og avgerð á skránni hósdagin. 

Fullur limaskapur

Talan er um fullan limaskap í Norðurlandaráðnum og part í norðurlendskum avtalum og millumtjóðasáttmálum.

Formansskapurin skal eisini viðgera og taka avgerð um eitt uppskot hjá Jenisi av Rana og Ruth Vang, umboðum løgtingsins í Norðurlandaráðnum í fjør, um føroyska luttøku í norðurlendskum avtalum og millumtjóðasáttmálum.

Formansskapurin mælir til ikki at fara víðari við føroysku umsóknunum. 

Tær verða ikki góðtiknar, tí í fyrsta umfari er talan um ein spurning millum Føroyar og Danmark, sigur formansskapurin hjá Norðurlandaráðnum.