Nýggj semingsroynd

Nýggjasta semingsroyndin er komin í lag, samstundis sum felagið fyrireikar seg til at herða verkfallið munandi.

Eftir at semingsroyndin millum Lønardeildina í Fíggjarmálaráðnum og Sjúkrarøktarfrøðingafelagið slitnaði, boðað felagið frá, at týsmorgunin verða øll trý sjúkrahúsini løgd lamin.

Samstundis boðsendi Sjúkrarøktarfrøðingafelagið øllum sínum álitisfólkum á fund fyrrapartin ídag.

Men nú er tað fyribils útsett, tí felagið fer á fund við semingsstovnin.

Terje Sigurðsson, semingsmaður, sigur við útvarpið, at hann hevur fingið ábendingar um, at okkurt nýtt er at arbeiða við, sum ikki lá á borðinum, tá partarnir fóru hvør til sítt.

-Tað er ein stórur vilji til at finna semju, og nú gera vit so eina roynd afturat, sigur Terji Sigurðsson. 

Áðrenn fundin í morgun hevur semingsmaðurin verið í samband við Lønardeildina hjá Fíggjarmálaráðnum.

Óluva í Gong, forkvinna í Sjúkrarøktarfrøðingafelagnum, hevur ongar viðmerkingar áðrenn fundin við Semingsstovnin í morgun.