"Politiska mótbrekkan er brøtt"

Tá Páll á Reynatúgvu, løgtingsformaður stutt fyri ólavsøku breyt arbeiðið hjá løgtinginum av og sendi tingfólk í summarfrí, gjørdist trupulleikin hjá samgonguni við fiskivinnunýskipanini størri, enn hann annars var frammanundan. 

Hetta heldur Ragnar Árnason Joensen, miðnámsskúlalærari í samfelagfrøði.

- Um løgtingið ikki klárar at avgreiða tað áðrenn Ólavsøku, so er tað ósikkurt, um man klárar at avgreiða fiskivinnunýskipanina áðrenn árið er úti, tí tú rennur teg í onnur ting í seinni helvt av tingárinum, enn tú gert í fyrru helvt, sigur Ragnar Árnason Joensen og sipar til, at mál sum pensjónnýskipan og fíggjarlógviðgerðir skulu avgreiðast, áðrenn árið er liðugt. 

Útjaðari vs. miðstaðarøki

Ragnar Árnason Joensen heldur, at aktuelli stríðspurningurin meira enn nakað annað snýr seg um stóra tvídráttin millum miðstaðarøkið og útjaðaran.

- Vit tosa ofta um vinstra og høgra, um loysing og samband, men alt for sjáldan um útjaðara og miðstað. Vargarnir eru typisk teir samgongupolitikarir, sum hava sínar røtir uttan fyri miðstaðarøki, sigur hann. 

Trupul mál fyrst

Valskeiðið er komið í helvt nú, og tað verður bara torførari at fáa trupul mál samtykt:

- Man plagar at siga, at man skal hava tey ópopuleru málini avgreidd nokk so tíðliga. Nú byrja vit at koma í helvt, og man hevur enn ikki avgreitt kanska tað mest umtalaða evni ella tað, sum man fór til val uppá, sigur Ragnar Árason Joensen.

Avbjóðingin hjá so smølum samgongum sum hesari er ein long balansugongd, sigur hann. Tí ein semja við Miðflokkin kann til dømis kosta honum dýrt, um hetta merkir, at onkur aðrir tinglimir bakka út. 

- Tað snýr seg allatíð at telja upp í 17, og tað er tað, sum er trupulleikin, tí løgmaður hevur 16 + Sonju, sum allatíð liggur sum ein hóttan.