Størri amerikanskt hernaðarvirksemi í Keflavík

Amerikansku hangararnir á flogvøllinum í Keflavík skulu umvælast fyri 14 milliónir dollarar ella slakar 90 milliónir krónur.

Tað hevur amerikanska kongressin samtykt, og lógin bíðar bert eftir undirskrift forsetans.

Amerikanska sjóverjan skal brúka hangararnar í Keflavík til flogfør, sum eru serútgjørd at leita eftir kavbátum við.

Russiska kavbátavirksemið økist

Amerikanarar hava 59 slík flogfør og átta teirra skulu hava støð í Íslandi, tí russiska kavbátavirðkemið í Norðuratlantshavi økist, serliga nærhendis Íslandi, skrivar Iceland-review.

Ein talsmaður fyri amerikanska verjumálaráðið sigur við blaðið, at Rusland økir um kavbátavirksemið í Norðuratlantshavi fyri at verða nærri amerikansku eysturstrondini, um ein kreppa skuldi tikið seg upp.

Magnus Nordenmann, serfrøðingur á amerikanska stovninum Atlantic Council í Washington, sigur, at Ísland aftur fer at gerast eins týðandi og tað var undir kalda krígnum, tí úr Íslandi ber til at halda eyga við virksemi Russlands í Norðuratlantshavi.

Ísland er í eini strategiskari lyklastøðu, og kann samanberast við ein flogbera í miðum Atlantshavi, ein flogbera, ið ikki ber til at søkkja, og sum flogfør kunnu flúgva til og frá, sigur Magnus Nordenmann.