Nógv fáa arbeiði á Jobmatch

Fleiri enn 60 fólk fingu boðið eitt starv ella eina uppgávu á Jobmatch í fjør.

Tað skrivar Syntesa, sum skipar fyri Jobmatch, í tíðindaskrivi.

52 arbeiðsgevarar, fyritøkur, kommunur og almennir stovnar, vera við á ráðstevnuni í ár.

Tað eru 30 fleiri enn í 2011.

Aftur hósdagin

Jobmatch verður í Norðurlandahúsinum nú hósdagin.

Á hvørjum ári verða eftirmetingar gjørdar. 

Tær vísa, at okkurt um triði hvør arbeiðsgevari, sum er við, hevur ítøkilig størv at bjóða.

Harafturat sigur meira enn helmingurin, at tær eru við fyri at koma í samband við lesandi, sum vilja skriva uppgávur ella koma í starvsvenjing.