17 fiskivinnukunngerðir lýstar

17 kunngerðir, sum á ymsan hátt eru við til at skipa fiskiskapin í ár, eru nú lýstar. Kunngerðirnar taka støði í tí fiskivinnunýskipan, sum løgtingið samtykti fyri jól, og sum kom í gildi í gjár - tað vil siga løgtingslóg nummar 161 frá 18.desember 2017 um fyrisiting av sjófeingi.

Tær 17 kunngerðirnar eru lýstar í kunngerðarblaðnum og á kunngerðarportalinum 29. desember. Tær snúgva seg um alt frá at friða leiðir kring Føroyar fyri fiskiskap til at býta og selja part av føroyskum kvotum á fjarleiðum á uppboðssølu.

Við støði í teimum kunngerðum, sum higartil eru lýstar, ber til at staðfesta, at í ár verða seld á uppboði 2891 tons av toski, 289 tons av hýsu og 155 tons av hvassaspreki - tað er eitt slag av flatfiski - burturav føroysku kvotunum í russiska partinum av Barentshavinum. Í norska partin av Barentshavinum verða seld á uppboðssølu 793 tons av toski, 185 tons av hýsu, 86 tons av upsa og 34 tons av øðrum botnfiski. Við Svalbard verða seld á uppboðssølu 271 tons av toski og 65 tons av øðrum botnfiski.

Hinvegin verður einki av føroysku toskakvotuni á Flemish Kap selt á uppboðssølu í ár. Føroysk skip kunnu í ár fiska 2491 tons av toski á Flemish Kap. Fiskiskapurin á Flemish Kap verður skipaður við felagskvotu, og alt skal fiskast við línu. Sambært kunngerðini kann fiskiskapurin byrja 7. januar.

Millum tær 17 kunngerðirnar, sum eru lidnar og lýstar at koma í gildi, er eisini kunngerðin, sum skipar svartkjaftafiskiskapin í ár. Føroyska svartkjaftakvotan er 493.000 tons í ár, av teimum eru 393.000 tons sett av til føroysk skip at fiska, meðan 100.000 tons verða latin øðrum londum í umbýti við í høvuðsheitum botnfisk í Barentshavinum. Tey 393.000 tonsini av svartkjafti verða býtt soleiðis, at tey reiðarí, sum higartil hava havt rættindi at fiska svartkjaftin, fáa útlutað umleið 270.000 tons at fiska. 97.000 tons verða seld á uppboðssølu, og 33.000 tons verða lutað út sum menningarkvotur. 

Kunngerðirnar, sum skipa fiskiskapin eftir hinum stóru uppsjóvarfiskasløgunum, makrel og norðhavssild, í ár, eru ikki lýstar enn. 

Kunngerðin, sum setir treytir um at øll veiða hjá føroyskum skipum skal landast um føroyskan bryggjukant, er lýst og komin í gildi. Í somu kunngerð stendur, at reglan, um at 25 prosent av veidda fiskinum skal bjóðast út á eini góðkendari uppboðssølu, kemur í gildi 1.mars.

Sambært lógini um fyrisiting av sjófeingi skal alt av fiski førast til lands. Í grein-48 í lógini stendur, at innvølur, ryggur, skræða, høvd og tílíkt av fiski skal førast til lands. Víðari stendur í stykki-2, at í minsta lagi 20% av fiskinum skal førast til lands við høvdi. Men ein av kunngerðunum, sum varð lýst 29.desember í fjør, setir úr gildi hesar ásetingar í sjálvari lógini. Undantøkini frá at føra alt av fiski til lands, koma í gildi ídag, 1.januar.
 
Samtykta fiskivinnunýskipanin krevur nógv fleiri kunngerðir enn hesar 17, ið nú eru lýstar og komnar í gildi.

Í løtuni er eingin fiskivinnuavtala millum Føroyar og Ísland. Ein avleiðing av tí er, at føroysk skip sleppa ikki at fiska í íslendskum sjógvi og íslendsk skip sleppa ikki at fiska í føroyskum sjógvi. Tí ber heldur ikki til at skipa henda fiskiskap við kunngerð.