- Tíðindi, mentan og ítróttur
Fáa tveir dagar afturat at virka lodnu til matna
Fiskirættindaavtalan, sum Føroyar og Ísland gjørdu í gjár, er neyvan betri fyri Føroyar enn tann, sum var galdandi fjør.
Íslendska fiskimálaráðið kunngjørdi tíðliga seinnapartin í gjár, at føroyingar kunnu framvegis fiska fimm prosent av íslendsku lodnukvotuni. Hámarkið er tó nú 25.000 tons í staðin fyri 30.000.
Og føroyingar hava fingið tveir dagar afturat, frá 15.februar til 17.februar, at landa lodnu til matna í Føroyum ella virka hana umborð.
Eftir 17.februar skulu føroysk skip landa minst tveir triðingar av lodnuni í Íslandi.
Er fiskiskapurin góður, gera tveir dagar mun. Sum skilst bað Fiskimálaráðið um eina viku afturat.
Íslendingar kunnu nú hava 15 í staðin fyri 12 skip í senn á svartkjaftaveiðu í føroyskum sjógvi.
Sama toskakvota
Føroyar hava somu botnfiskakvotu í íslendskum sjógvi, 5.600 tons. Toskur má, eins og í fjør, í mesta lagi vera 2.400 tons.
Ísland fær aftur í ár 1.300 tons av makrelkvotuni hjá føroyingum í føroyskum sjógvi.
Men Ísland sigur frá sær 2.000 tons av sild, sum leingi hava staðið í avtaluni landanna millum, men sum íslendingar ikki hava fiskað í nógv ár.
Føroyar og Ísland miða eftir at gera rammuavtalu um fiskivinnu sum skjótast. Arbeiðið at fyrireika slika avtalu skal vera liðugt fyri 1.september í ár.
Úr Fiskimálaráðnum í Føroyum er eingin almenn fráboðan komin um semjuna, sum Høgni Hoydal, landsstýrismaður, og Kristján Þór Júlíusson, íslendski fiskimálaráðharrin, gjørdu fyrrapartin í gjár.
Men føroysku reiðaríni fingu at vita fyrrapartin í gjár, at tey kundu fara til Íslands at fiska lodnu.
Ótolnir
Íslendskir reiðarar bíða nú ótolnir eftir boðunum frá íslendskum fiskifrøðingum, um lodnukvotan verður størri í ár.
Havrannsóknarstovan kannar nú útbreiðsluna hjá lodnuni og støddina á lodnustovninum fyri at kunna áseta kvotuna.
Sum er, er kvotan 200.000 tons. Føroyar eiga fimm prosent av kvotuni, 10.000 tons.
Hon er býtt millum sjey skip, men í átta partar, tí Finnur Fríði eigur tveir partar. So, hvørt skipið eigur ikki nógva lodnu.
Føroysku reiðaríini hava fingið at vita úr Fiskimálaráðnum, at loyvini verða skrivað í morgin ári.
Norðborg fór av stað seinnapartin í gjár og bíðar norðanfyri eftir at sleppa í íslendskan sjógv.
Høgaberg er eisini klárt at fara.