Skaðanevndin skrivar eina lýsing, hon dømir ikki

Eingin ábyrgd verður staðfest í kanningini hjá donsku skaðanevndini um vanlukkuna, tá farmaskipið Mykines og útróðrarbáturin Mars stoyttu saman í fjør summar.

Skaðanevndin skal ikki fella dóm, sigur kanningarleiðarin.

Hon skal bara lýsa tað, sum hendi.. 

Í frágreiðingini hjá Den Maritime Havarikommission um vanlukkuna í Skopunarfirði í fjør er eingin niðurstøða, sum beinleiðis sigur, hvør hevði skyldina av samanstoytinum millum Mykines og Mars.

Tað er ikki uppgávan hjá skaðanevndini at staðfesta ábyrgd, sigur kanningarleiðarin hjá skaðanevndini, Øssur Jarleivson Hilduberg, í grein í blaðnum Søfart í oktober í fjør, tá funnist varð at arbeiðinum hjá nevndini, tí hon hevur ikki royndirnar, sum sjómenn hava.  

Vánaligur sjómansskapur

Nevndin eigur at leggja størri dent á sjómansskap í kanningum sínum, varð sagt.

Men vánaligur sjómansskapur er ikki einasta orsøk til vanlukkur á sjónum, verri enn so.

Orsøkin er oftast meira fløkt enn so, sigur Øssur Jarleivson Hilduberg. 

Vanliga kannaðu fyrrverandi yvirmenn á skipum vanlukkur á sjónum. Teir brúktu egnar royndir til at meta um vanlukkurnar.

Men tað er ikki tann rætti mátin.

Tað ber ikki til við egnum royndum at greina allar vanlukkur ella øll óhapp á sjónum. 

Tað er ein fordómur, at dugnaloysi er orsøkin til vanlukkurnar og óhappini.

Tað ber ikki til at greina vanlukkur við bara at siga, hvat átti at verið gjørt øðrvísi.

Læra ikki døma

Niðurstøðan er, at kanningarnar skulu brúkast til at læra av. Tær eru ikki ein dómur. 

Øssur Jarleivson Hilduberg vil ikki gera samrøðu við Útvarpið um frágreiðingina um samanstoytin millum Mykines og Mars 31.august í fjør.

Hans Johannes á Brúgv, stjóri á Sjóvinnustýrinum, sigur, at har hava tey ikki avgjørt enn, um frágreiðingin hjá donsku skaðanevndini er so álvarslig, at hon verður send fútanum.

Tað vil siga, um onkur skal ákærast fyri vanlukka.