Noyðast at góðtaka uppíblanding frá øðrum

Sum partur av altjóða samfelagnum sleppa vit ikki undan, at onnur leggja seg út í føroysk viðurskifti.

Tað sigur Poul Michelsen, landsstýrismaður. í svari til Jógvan á Lakjuni, løgtingmann, sum spurdi um samskiftið millum Føroyar og ST.

Poul Michelsen sigur í svarinum, at vit hava sjálv avgjørt at taka undir við ST-sáttmálunum á mannarættindaøkinum og hava harvið bundið okkum til at samskifta við ST um hesi viðurskifti. 

Tað kann kanska tykjast margháttligt, at nevndir við umboðum úr minni framkomnum londum enn Føroyar geva føroyskum myndugleikum góð ráð. 

Tað skal tó eingin ivi vera um, at avgerðirnar um, hvussu vit skipa okkara samfelag, verða tiknar í Føroyum. 

Og soleiðis verður eisini í framtíðini.

Eiga at lurta eftir øðrum  

Men tað ger einki, um vit lurta eftir øðrum.

Jógvani á Lakjuni, løgtingsmaður, spyr millum annað, um hvørjir serfrøðingar hjá ST eru, sum hava hava mælt Føroyum til, at lógin um fosturtøku eigur at verða dagførd soleiðis, at gentur í Føroyum fáa somu atgongd til trygga og lógliga fosturtøku, sum gentur í meginlandinum, Danmark.

Í svarinum stendur, at 18 serfrøðingar eru í Barnarættindanevndini hjá ST.

Tey eru nevnd við navni og starvi í svarinum og úr hvørjum landi, tey eru.

Tey eru úr Togo, Barain, Marokko, Spania, Monako, Russlandi, Tunesia, Sambia, Egyptalandi, Etiopia, Sámoa, Japan, Uruguai, Venesuela, Noregi, Suðurafrika, Bulgaria og Eysturríki.