Trump finnist at FBI

Fyri stutt skeyt og drap Nikolas Cruz 17 fólk á einum skúla í Parkland í Florida. Nú vísir tað seg, at amerikanska samveldisløgreglan, FBI, hevði fingið eitt prei um drápsminnin áðrenn skottilburðin. 

Hetta hevur fingið Donald Trump, forseta, til at finnast hvassliga at FBI. 

Brúka tíðina upp á russarar

Forsetin sigur, at orsøkin er, at samveldisløgreglan brúkar ov nógva tíð at royna at prógva, at russar samstarvaðu við tey, sum løgdu valstríðið hjá Trump til rættis.

13 russarar eru skuldsettir í málinum, men Trump vísir aftur, at starvsfólk hjá sær samstarvaðu við russar undir valstríðnum.

Verjin hjá Nikolas Cruz fanst eisini at FBI, tá málið kom fyri rættin. 

Verjin segði, at øll reyð fløgg veittraðu í fullari stong, tí Nikolas Cruz á Youtube boðaði frá, at hann ætlaði at vera professionellur skúla-skotmaður, sum hann tók til. 

Á Instagram vóru myndir av vápnum, og vápnið, sum hann brúkti at skjóta við, keypti Cruz ólógliga. Hann varð eisini koyrdur úr skúlanum, tí hann hevði hótt næmingar, segði verjin á rættarfundinum.