Maersk skip í ljósum loga

Ógvusligur eldsbruni er umborð á einum bingjuskipi hjá Maersk, sum er á veg úr Singapore til Suez. Eldur kom í skipið seinnapartin í gjár, okkara tíð.

Maersk Line boðar í morgun frá, at 23 av manningini umborð á Maersk Honam eru fluttir av skipinum, men fýra av manningini eru higartil ikki komnir afturíaftur.

Støðan er álvarslig, og Maersk Honam stendur framvegis í ljósum loga.

13 av manningini koma úr India, níggju av Filipsoyggjunum, tveir úr Thailandi, og hinir tríggir eru úr Rumenia, Suðurafrika og Stórabretlandi.

Bingjuskipini MSC Lauren, Edith Maersk og Gerd Maersk hava sett kós móti Mærsk Honam fyri at vera við í bjargingararbeiðnum. Sambært tíðindaskrivi frá Maersk Line eru skipini frammi nú í morgun.

Maersk Honam liggur í Arabiska havinum, okkurt um 900 fjórðingar í ein landsynning úr Salalah í Oman.

Skipið er spildurnýtt, bygt í 2017. Umborð eru 7860 bingjur.