May rekur 23 russiskar diplomatar av landinum

Russland er illgruna fyri at hava eitrað tey bæði, og Bretland kravdi at fáa eina frágreiðing frá russiskum myndugleikum í seinasta lagi á midnátt, men eingin frágreiðing er komin.

Theresa May, forsætisráðharri, kunngjørdi avgerðina um at reka diplomatarnar av landinum í eini røðu í parlamentinum fyrr í dag.

Forsætisráðharrin hevur givið diplomatunum freist í eina viku at fara av landinum. Hetta er fyrstu ferð í 30 ár, at so nógvir diplomatar eru vístir úr Bretlandi.

Theresa May upplýsti í røðuni, at hvørki bretskir ráðharrar ella umboð fyri kongshúsið fara til heimsmeistarakappingina í fótbólti, sum verður í Russlandi í summar.

Allir toppfundir millum Bretland og Russland verða eisini avlýstir. 

- Eg toli ikki, at borgarar í Bretlandi verða hóttir eftir lívinum, sigur forsætisráðharrin.

Bretskir myndugleikar hava kravt at fáa eina frágreiðing, hví eiturevnið Novichok, sum varð ment í Sovjetsamveldinum undir kalda krígnum, er endað í Salisbury í Bretlandi, har Skripal og dóttir hansara vórðu eitrað 4. mars. 

Tey liggja bæði á sjúkrahúsi, og støðan er álvarsom.