Sjálvstýri ikki í samgongu

Jógvan Skorheim, formaður í Sjálvstýri, sigur, at róð hevur verið framundir, at Sjálvstýri skal gerast partur av samgonguni. 

Men, sigur hann, soleiðis verður ikki, tí fiskivinnupolitikkurin skilir partarnar.

- Tá hendan samgongan varð skipað, skilti fiskivinnupolitikkurin samgonguna og Sjálvstýri, og eg má staðfesta, at tað ger hann enn, sigur Jógvan Skorheim. 

Hann sigur, at Sjálvstýri kann til dømis ikki taka undir við uppskotinum um veiðigjald, sum nú er í løgtinginum.

Flokkurin tekur heldur ikki undir við, at heimaflotin skal hava kvotur.

Sjálvstýri hevur tveir tingmenn, og við teimum hevði samgongan fingið meirilutin aftur í tinginum.

Sjálvstýri stuðlar tó samgonguni í pensjónsmálinum, sum flokkurin tekur undir við.

Flokkurin hjálpti eisini samgonguni við fíggjarlógini fyri 2018.