Læraratrot í Grønlandi

Doris J. Jensen, landsstýriskvinna í undirvísingarmálum, upplýsti á einum valfundi upp undir landstingsvalið 24. apríl, at tørvur verður á 300 lærarum í Grønlandi um tíggju ár. 

Hon segði, at tørvurin verður so stórur, tí læraraskúlin í Grønlandi hevur hert upptøkukrøvini. Tað merkir, at færri fáa læraraútbúgving, skrivar Sermitsiaq.

Landsstýriskvinnan í undirvísingarmálum heldur, at tað eigur at verða umhugsað, um krøvini at sleppa á læraraskúla skulu linkast.

Doris J. Jensen sigur, at hóast krøvini verða linkað, eigur dygdin í útbúgvingini at verða óbroytt. 

Hon sigur, at verður einki gjørt, verður tørvurin á útlendskari arbeiðsmegi størri.

Í løtuni eru 246 ósett størv í fólkaskúlanum. 79 ósett størv verða røkt av lærarum, sum arbeiða yvirtímar.

167 fólk, sum ikki hava læraraútbúgving, undirvísa í grønlendska fólkaskúlanum.

Læraraskúlin ætlar at kanna kunnleikastigið hjá hjá lærarum, sum ikki hava útbúgving, og hvussu nógvir verða mettir at hava førleika at fara á læraraskúla.