Fleiri limalond í ES

ES nevndin mælir til at fara undir ítøkiligar samráðingar við Albania og Makedonia.

Tilsamans sjey lond vilja gerast limir í ES, og sambært uttanríkisráðharranum, Federica Mogherini, er gongdin tann rætta vegin í øllum sjey londunum. Tað høvdu vit ikki roknað við fyri trimum árum síðani, sigur Mogherini.

Tað eru limalondini í ES, sum gera av, um fleiri lond skulu fáa limaskap í samveldinum.

Samráðingarnar við Serbia og Montenegro eru so smátt byrjaðar, og sambært ES gongur framá við teimum samráðingunum.

Tá talan er um Kosovo og Bosnia-Hersegovina, er støðan framvegis ógreið, og tey bæði londini eru ikki sloppin inn í hitan enn.

Samráðingarnar við Turkaland steðgaðu eftir kvettroyndina í 2016, og har eru í løtuni smá útlit fyri framgongd, sigur ráðharrin hjá ES, sum stendur fyri samráðingunum við londini sum vilja uppí, Johannes Hahn.

Hann sigur seg hava varhugan av, at Turkaland flytir seg burtur frá ES, serliga tá talan er um rættartrygd og grunleggjandi rættindi í landinum.