LGBT-aktivistur handtikin í Moskva

Nú HM í fótbólti er byrjað, so eru tað kortini ikki øll, sum bara eru komin til Moskva fyri at hyggja eftir fótbólti.

Bert fáar minuttir undan fyrsta bríksli í fyrsta HM-dystinum í gjár, varð bretski, Peter Tatchell, sum er aktivistur fyri LGBT handtikin á Reyða torginum í Moskva. Tað skrivar Reuters.

Peter Tachell er kendur aktivistur, og hann plagar at brúka ógvusligar mátar fyri at gera vart við sín boðskap. Men í gjár stóð hann pinna stillur við eini plakat í hondini, sum skuldsetur Putin fyri ikki at gera nakað við, at samkynd í Tjetjenia verða forfylgd.

Fyrst tosaði russiska løgreglan við Tachell, men eftir 10 minuttir bað løgreglan hann seta seg inn í ein politibil.

- Russiskir myndugleikar og løgregla gera ov lítið fyri at berja niður víðgongdu bólkarnar, sum leypa á LGBT-fólk og fremja harðskap og eyðmýkja tey, segði Tatchell áðrenn løgreglan koyrdi avstað við honum.

Handtøkan hevur fingið nógv uppmerksemi í altjóða fjølmiðlum. 

Tað er væl kent, at nógvir fordómar eru móti samkyndum, og at tey verða diskiminerað í Russlandi og í grannalýðveldunum.

Tatchel hevur verið í Russlandi fleiri ferð. Í 2007 fekk hann heilaskaða, eftir at  russiskir nýnazistar lupu á hann, skrivar The Independent.