Dátueftirlitið kunnað reiðarí um vakmyndatól

Tað er ikki loyvt at brúka vakmyndatól fyri at hava eftirlit við starvsfólkum. Tað gera Dátueftirlitið vart við í kunningarskrivi til manningarfeløg, reiðarí og onnur.

Dátueftirlitið er vorðið varugt við, at nýtsla av vakmyndatólum so at siga er vanlig umborð á føroyskum fiskiskipum.

Eftirlitið metir tað tískil vera neyðugt at koma við kunningarskrivi til føroysk reiðarí, manningarfeløg og onnur, soleiðis at allir áhugapartar hava møguleika at kenna mørkini fyri lógligari vakmyndatólsnýtslu, sigur Dátueftirlitið í skrivi, sum er lagt á heimasíðuna hjá Maskinmeistarafelagnum.

Dátueftirlitið ger greitt, at vakmyndatól bara kunnu verða brúkt til lóglig og saklig endamál, og at Dátueftirlitið ongantíð góðtekur, at vakmyndatól verða brúkt til at hava starvsfólk undir støðugum eftirliti, sæst í skrivinum.