Trump: Google villleiðir við leitiúrslitum

Amerikanski forsetin, Donald Trump, skuldsetur Google fyri at villleiða leitiúrslitini, og tí koma so nógvar neiligar søgur um forsetan á skíggjan, tá leitað verður á Google.

Trump skrivar á Twitter, at verða leitiorðini Trump News nýtt, eru 96 % av úrslitunum frá vinstrahallum miðlum.

- Við øðrum orðum villleiðir Google, so nærum øll tíðindi eru ring, skrivar Donald Trump.

Hann skrivar eisini, at serliga nógv tíðindi eru frá sjónvarpsmiðlinum, CNN.

- Google kúgar konservativu røddirnar og krógvar upplýsingar og tíðindi, sum eru jalig, sigur forsetin.

Donald Trump sigur einki um, hvør keldan er til hetta uppáhaldið. Men konservativi miðilin, PJ Media, kom til sama úrslit í eini greining fyri fáum døgum síðani.

PJ Media vil vera við, at 43 % av fyrstu 100 leitiúrslitunum vóru frá CNN, Washington Post ella NBC.

Einki leitiúrslit var frá PJ Media, sum styðjar Donald Trump.