Borgarstjórasessurin og løgtingssessurin á skrá

Heilsu og Innlendismálaráðið vil hava málið um borgarstjórasessin og løgtingsessin á skrá á næsta býráðsfundi hjá Tvøroyar býráð. Tað er andstøðan í býráðnum, sum hevur vent sær til Heilsu og Innlendismálaráðið, sum hevur eftirlit við kommunum.

Sjálvt um tað er borgarstjórin, ið gevur fundarboð og fyrireikar kommunustýrisfundir, so er markið fyri, nær borgarstjórin kann nokta at seta eitt mál á skrá, sum ein býráðslimur hevur ynkst at fáa á skrá, avmarkaður, sigur heilsu og innlendismálaráðið.

Tað, at nógvir ivarspurningar eru, ið borgarstjórin vil hava nærri útgreinað, er ikki í sjálvum sær nóg mikið til at nokta einum kommunustýrislimi at fáa mál á skrá, skrivar heilsu og innlendismálaráðið.

Heilsu og Innlendismálaráðið vil við hesum heita á borgarstjóran um at seta omanfyrinevnda mál á skrá til næstkomandi býráðsfund, endar brævið frá ráðnum til Kristin Michelsen borgarstjóra, sum Kringvarpið hevur fingið innlit í.

Næsti býráðsfundur á Tvøroyri skal vera 5. november.