Nýggja politistøðin seinkað

Ríkispolitiið skal rinda Bygningsstyrelsen 7,7 milliónit krónur í leigu fyri nýggju politistøðina í Havn.

Afturat koma aðrar útreiðslur, millum annað til streym og hita. Útreiðslan verður 8,6 milliónir krónur um árið. Tað eru 5,4 milliónir krónur meira enn nú.

Men arbeiðið er seinkað, og tað verður eisini dýrari enn ætlað.

Ole Birk Olesen, ráðharri í byggimálum, hevur biðið Fíggjarnevndina hjá fólkatinginum um at hækka játtanina til nýggju politistøðina í Havn úr 108 milliónum upp í 138 milliónir krónur.

Danska Fíggjarmálaráðið hevur góðtikið umbønina.

Fíggjarnevndin hevur fund hósdagin.

Danska byggifelagið Ommen og Møller skal gera gamla bankabygningin við Húsagøtu í Havn til politistøð.

Einki felag í Føroyum sýndi áhuga fyri arbeiðinum, sigur Ole Birk Olesen. 

Tí er arbeiðið vorðið dýrari, stendur í umsóknini til Fíggjarnevndina hjá fólkatinginum.

Ríkispolitiið skal leiga 3.175 fermetrar frá Bygningsstyrelsen. Skrivstovurnar eru 2.200 fermetrar.