Vit skulu vinna á Føroyum

Fyri løtu síðan helt maltesiski venjarin, Ray Farrugia, tíðindafund.

Hann var ógvuliga greiður, tá journalistarnir spurdu hann, hvat hann helt vera eitt nøgtandi úrslit móti Føroyum.

- Eg eri ongantíð nøgdur við at tapa, men eg haldi, at hetta er ein serligur møguleiki fyri at Malta kann fáa ein sigur, segði Ray Farrugia.

Leygarkvøldið tapti Malta á heimavølli 0-5 fyri Kosovo. Venjarin sigur, at hansara uppgáva hesar seinastu dagarnar hevur verið at motivera spælararnar.

- Tað er hart at tapa 0-5. Men spælararnir hava víst sera góðan hugburð. Teir vilja reisa seg, og teir vilja vinna á Føroyum, segði maltesiski venjarin.

Ray Farrugia segði eisini, at hann var als ikki í iva um, at Malta var komið í sterkasta bólkin í UEFA Nations League D.

- Bíði tit bara. Um nøkur ár fara tit at síggja, at Kosovo er nógvar ferðir sterkari enn tit ganga og halda beint nú. Teir hava nógvar kvalitetsspælarar.

- Aserbadjan er eitt sterkt lið, og tað eru Føroyar eisinini. Eg eri sannførdur um, at Malta hevði havt fleiri stig, um lutakastið hevði koyrt okkum í ein annan bólk.

Dysturin millum Malta og Føroyar verður týskvøldið klokkan 19.45. Sjónvarpið sendir dystin beinleiðis.