Europol steingir fleiri túsund heimasíður

Europol hevur í stórum altjóða átakið stongt 33.654 økisnøvn, sum selja falskar vørur á netinum.

Í samskipaða átakinum, sum var í 26 londum, hevur evropiska løgreglusamstarvið handtikið 12 persónar og lagt halda á eina miljón evrur, - tað svara til 7,5 miljónir krónur, upplýsir Europol í tíðindaskrivi.

Tað er ikki upplýst, hvagani tey 12 handtiknu koma.

Átakið kallast "In Our Sites", og er afturvendandi alheims átak, sum fyrstu ferð varð sett í verk í 2014 og er vaksið í vavi síðani.

Ymiskir myndugleikar í fleiri londum hava verið við í seinastu átøkunum fyri at hjálpa Europol.

Tí eru alsamt fleiri falskir net-handlar avdúkaðir og hald er lagt á økisnøvnini. 

Undir seinastu átøkunum vórðu 20.520 økinøvn stongd, men hetta seinasta átakið hevur stongt 33.654 økisnøvn.