- Tíðindi, mentan og ítróttur
Eingin orsøk at broyta afturlatingarlógina
![](https://kvf.fo/sites/default/files/styles/grein-ovasta-mynd/public/96a60b9dd53b50a1aabf8086e7611579.png?itok=pKRz9zZO)
Galdandi lóg er nóg góð og hon riggar væl.
Tað sigur Handilsvinnufelagið um ætlanina hjá Vinnumálaráðnum at broyta afturlatingartíðirnar hjá handlunum.
Felagið hevur tó ampa av ásetingini, sum loyvir kommunustýrum at loyva handlum at hava opið á stevnum og tá størri fremmandavitjanir eru.
Hugtøkini størri fremmandavitjanir og stevnur eru ov ógreið.
Handilsvinnufelagið vil tí hava orðingarnar broyttar, so tær verða meira nágreiniligar.
Kommunur avgera sjálvar
Ein møguleiki er at víðka heimldina hjá kommununum, so tær sjálvar gera av, nær tær geva serloyvi, heldur Handilsvinnufelagið.
Annars heldur felagið, at øll eiga at sleppa at hava opið sunnudagar, ikki bara tey, sum selja matvørur.
Annars verður lógin kappingaravlagandi.
Sum felagið sigur í hoyringarsvarinum, at skal liberaliserast, liberaliserið so alla lógina
Felagið heldur eisini, at í staðin fyri at geva loyvi til at hava opið sunnudagar í desember, eiga allir handlar at fáa loyvi til at hava opið allar ársins sunnudagar.
Spurningurin er, um vit ikki eiga at gera eina nýggja halgidagslóg og lata hana skipa afturlatingina hjá handlunum, heldur Handilsvinnufelagið.