Fíggjarnevndin viðger aftur gomul uppskot

Hóast tingskipanin sigur, at ein løgtingsnevnd skal lata løgtinginum álit í seinasta lagi ein mánað eftir, at hon fekk málið, eru málini, sum Fíggjarnevndin fer at viðgera í morgin, nógv eldri enn ein mánað.

Í seks førum hevur Fíggjarnevndin tó biðið formannin um longri freist.

Tað gongst millum annað striltið hjá Fíggjarnevndini at avgreiða málið um varskógvaraskipan hjá tí almenna, sum skuldi koma í gildi á nýggárinum.

Kristina Háfoss, landsstýriskvinna, legði lógaruppskotið fram 21.august.

Fyrsta viðgerð var 10.september. Síðani hevur Fíggjarnevndin havt uppskotið.

Tvey berghol

Tvey berghol eru eisini á skránni, tá Fíggjarnevndin hevur fund í morgin. 

Andstøðuflokkarnir og Kristin Michelsen, sum tá var í tingbólkinum hjá Javnaðarflokkinum, løgdu fram uppskot um berghol til Fámjins. Tað var 3.oktober.

Málið hevur verið í Fíggjarnevndini síðani 7.november, tá fyrsta viðgerð var.

Hitt bergholið er til Dals. Miðflokkurin kom við uppskoti um tað tann 4.desember, og fyrsta viðgerð var 11.desember.

Onnur gomul mál eru á skránni hjá Fíggjarnevndini í morgin. 

Tey eru barnaheimið, skattafría útgjaldið úr Samhaldsfasta, tað málið fór aftur í nevnd, tá onnur viðgerð var 5.desember, og landsroknskapurin fyri 2017. 

Uppskotið hjá Miðflokkinum um bústaðarbanka er eisini á skránni í morgin.

Tað hevur ligið í Fíggjarnevndin síðani 8.november.    

Nógvar innkallingar eru til fundin hjá Fíggjarnevndini í morgin.

Tey innkallaðu eru Fámjins kommuna, landsstýrismaðurin í samferðslumálum, Kommunufelagið, Felagið Føroyskir sjúkrarøktarfrøðingar, Útoyggjafelagið, Felagið Peningastovnar, Landsbankin, Bústaðir og løgmaður. 

Tingfundur fríggjadagin

Tingfundur verður seinnapartin fríggjadagin.

Bara tvey mál eru á skránni. 

Tingið skal atkvøða, um skrivligi fyrispurningurin hjá Kaj Leo Holm Johannesen í Sambandsflokkinum til Sirið Stenberg, landsstýriskvinnu, um tilboðið frá Novo Nordisk grunninum um diabetisviðgerð í Føroyum, skal svarast.

Og framløga er eisini á skránni hjá tinginum fríggjadagin.