Pompeo avlýsir vitjan í Grønlandi

Eftir ætlan skuldi hann koma til Kangerlussuaq í morgin ári, har grønlendska landsstýriskvinnan í uttanríkismálum, Ane Lone Bagger, og danski uttanríkisráðharrin, Anders Samuelsen, skuldu standa fyri honum.

Teir tríggiur uttanríkisráðharrarnir skuldu eftir ætlan tosa um trygdarviðurskifti.

Stórar fyrireikingar hava verið í Grønlandi í sambandi við vitjanina, men protokol-stjórin hjá grønlendska Sjálvstýrinum, Jakob Rohmann Hard, kann enn ikki upplýsa, hví vitjanin verður av ongum, skrivar grønlendska kringvarpið, KNR, men sambært Sermitsiaq vóru onnur átrokandi mál, sum kravdu, at uttanríksiráðharrin var til staðar.

Iran boðaði í dag frá, at landið tekur seg burturúr pørtum av kjarnorkuavtaluni, og tað kann vera orsøkin til, at Pompeo sum skjótast fór heimaftur til Washington. 

Pompeo vitjaði mándagin og týsdagin í Finnlandi, har aritiskur ráðharrafundur varð hildin. Vitjanin í Grønlandi var partur av rundferð, og Pompeo og hansara fólk skuldu eftir ætlan vitja í Berlin í gjár og London í dag og so Grønland í morgin. 

Vitjanin í Berlin hjá Merkel varð eisini avlýst, og amerikanska sendinevndin fleyg í staðin heim aftur til USA. 

Skrivstovustjórin hjá grønlendska sjálvstýrinum sigur, at amerikanarar hava ikki avlýst vitjanina, men útsett hana.

Mike Pompeo kundi verið fjórði amerikanski uttanríkisráðharrin, sum hevur vitjað Grønland. Fyrr hava Colin Powell, Hillary Clinton og John Kerry vitjað í Grønlandi, skrivar knr.